3.4     "Ich unde ein wip, wir haben gestriten..."
                                                                              (um 1188/1189)

I        Ich unde ein wip, wir haben gestriten 
         nu vil manege zit. 
         ich han von ir zorne vil erliten. 
         noch heldet si den strit, 
   5    nu waenet si dur daz ich var 
        daz ich si laze fri.
        got vor der helle niemer mich bewar, 
        ob daz min wille si.
        swie vil daz mer und ouch die starken linde toben, 
 10   ichn wil sie niemer tac verloben. 
       der donreslege möhte ab lihte sin 
       da si mich dur lieze.
       nu sprechent wes si wider mich genieze. 
       si kumet mir niemer tac uz den gedanken min.

II    Ob ich si iemer mere gesehe, 
      desn weiz ich niht für war. 
      da bi geloube mir, swes ich ir jehe, 
      ez get von herzen gar. 
 5   ich minne si vür alliu wip 
      und swer ir des bi gote. 
      alle mine sinne und ouch der lip 
      daz stet in ir gebote.
      ine erwache nimer ezn si min erste segen 
10  daz got ir eren müeze phlegen
      und laze ir lip mit lobe hie gesten.
     dar nach ewecliche
     gib ir, herre, vrb'ide in dime riche.
     daz ir geschehe, also müeze ouch mir ergen.

III  Swie gerne ich var, so jamert mich 
      wiez noch hie geste.
      ich weiz wol, ez verkeret allez sich, 
     diu sorge tuot mir we. 
 5  die ich hie laze wol gesunt, dern vinde ich aller niht.
     der leben sol, dem wirt manic wunder kunt, 
     daz alle tage geschiht.
     wir haben in einem jare der liute vil verlorn. 
10 da bi so merket gotes zorn.
     nu erkennet sich ein ieglich herze guot.
     diu werlt ist unstaete.
     ich meine die da minnent valsche raete:
     den wirt ze jungest schin wies an dem ende tuot.

IV  Swer minne minnecliche treit 
     gar ane valschen muot, 
     des sünde wirt vor gote niht geseit. 
     si tiuret unde ist guot. 
5   wan sol miden boesen kranc 
     und minnen reiniu wip.
     tuo erz mit triuwen, so hab iemer danc 
     sin tugentlicher lip.
     kunden si ze rehte beidiu sich bewarn, 
10 für die wil ich ze helle varn.
    die aber mit listen wellent sin,
    für die wil ich niht vallen.
    ich meine die da minnent ane gallen,
    als ich mit triuwen tuon die lieben vrouwen min.