3.2   "Min erste liebe der ich ie began..."
                                                                       (um 1188/1189)

I      Min erste liebe der ich ie began,
       diu selbe muoz an mir diu leste sin. 
       an vröiden ich des dicke schaden han. 
       iedoch so ratet mir daz herze min, 
   5  solde ich minnen mer dan eine, 
      daz enwaere mir niht guot: 
      sone minnet ich deheine. 
      seht wie maneger ez doch tuot.

II    Ich wil ir raten bi der sele min,
      durch keine liebe, niht wan durch daz reht. 
      waz möhte ir an ir tugenden bezzer sin 
      dan obes ir umberede lieze sieht, 
  5  taete an mir einvaltecliche, 
      als ich ir einvaltic bin. 
      an vröiden wirde ich niemer riche, 
      es enwer ir beste sin.

III  Ich wände daz min kume waere erbiten:
     dar uf het ich gedingen manege zit. 
     nu hat mich gar ir vriundes gruoz vermiten, 
     min bester trost der waen da nider gelit. 
 5  ich muoz alse wilen vlehen,
     und noch harter, hulfe ez iht. 
     herre, wan ist daz min lehen 
     daz mir niemer leit geschiht?

IV Ich han dur got daz kriuze an mich genomen 
     und var da hin durch mine missetat. 
     nu helfe er mir, ob ich her wider kome, 
    ein wip diu grozen kumber von mir hat, 
5  daz ich si vinde an ir eren: 
    so wert er mich der bete gar, 
    sül aber si ir leben verkeren, 
    so gebe got, daz ich vervar.